പാലക്കാട്: പാലക്കാട് ധോണിയിൽ ജനവാസ മേഖലയിൽ ഇറങ്ങിയ പുലി കെണിയിൽ കുടുങ്ങി. ലിജി ജോസഫിന്റെ വീട്ടിൽ വനം വകുപ്പ് ഒരുക്കിയ കൂട്ടിലാണ് ഇന്ന് പുലർച്ചെ പുലി കുടുങ്ങിയത്. മാസങ്ങളായി ധോണിയെന്ന ഗ്രാമത്തെ വിറപ്പിച്ച പുലിയാണ് ഒടുവിൽ കെണിയിലായിരിക്കുന്നത്.
ഇന്നലെ ലിജിയുടെ വീട്ടിലെത്തിയ പുലി കോഴിയെ പിടിച്ചിരുന്നു. അതുപോലെ കഴിഞ്ഞ വെള്ളിയാഴ്ചയും ഇവിടെയെത്തി പുലി ലിജിയുടെ കോഴിയെ പിടിച്ചിരുന്നു. ഇതിന്റെ അടിസ്ഥാനത്തിൽ വനം വകുപ്പ് ഒരുക്കിയ കെണിയിലാണ് ഇന്ന് പുലർച്ചെ 3:30 ന് പുലി കുടുങ്ങിയത്.
കഴിഞ്ഞ മൂന്നു മാസത്തിനിടെ ധോണിയിൽ 17 ഇടങ്ങളിൽ പുലിയുടെ സാന്നിധ്യം തിരിച്ചറിഞ്ഞിരുന്നു. കെണിയിൽ കുടുങ്ങിയ പുലിയെ വനവകുപ്പ് ഉദ്യോഗസ്ഥർ എത്തി മാറ്റിയിട്ടുണ്ട്. പുലിയെ മാറ്റുന്നതിനിടെ പഞ്ചായത്തംഗത്തെ പുലി മാന്തിയിരുന്നു. ഇയാളെ ആശുപത്രിയിലേക്ക് മാറ്റിയിട്ടുണ്ട്.
ഇതോടെ ധോണിയിൽ പുലിയുണ്ടെന്ന നാട്ടുകാരുടെ ആശങ്കയ്ക്ക് വിരാമമായിരിക്കുകയാണ്.