പാലക്കാട്: ലോഡ്ജിൽ സിനിമാ പ്രവർത്തകർ തമ്മിലുണ്ടായ വാക്കേറ്റത്തിനിടെ ഒരാൾക്ക് കഴുത്തിന് കുത്തേറ്റു. വടകര സ്വദേശി ഷിജാബിനാണ് കുത്തേറ്റത്. സംഭവത്തിൽ ഇയാൾക്കൊപ്പം താമസിക്കുന്ന നേമം സ്വദേശിയായ ഉത്തമനെ പാലക്കാട് സൗത്ത് പോലീസ് കസ്റ്റഡിയിലെടുത്തു.
പാലക്കാട് കെഎസ്ആർടിസി ബസ് സ്റ്റാൻഡിന് സമീപമുള്ള സിറ്റി ലോഡ്ജിൽ വെള്ളിയാഴ്ച പുലർച്ചെയാണ് സംഭവം. സിനിമാ ലൊക്കേഷൻ പ്രവർത്തകരായ ഉത്തമനും ഷിജാബും ഒരേ മുറിയിലായിരുന്നു താമസം.
പുലർച്ചെ നാല് മണിയോടെ ലോഡ്ജിലെത്തിയതിന് തൊട്ടുപിന്നാലെ ഇരുവരും തമ്മിൽ വാക്കേറ്റമുണ്ടാകയായിരുന്നു. കഴുത്തിൽ ആഴത്തിൽ മുറിവേറ്റ ഷിജാബ് തൃശ്ശൂർ മെഡിക്കൽ കോളേജിൽ ചികിത്സയിലാണ്. സംഘർഷത്തിന് കാരണമെന്താണെന്ന് വ്യക്തമായിട്ടില്ല.